Упаўнаважаным па справах рэлігій і нацыянальнасцей і Міністэрствам інфармацыі Рэспублікі Беларусь штогод праводзіцца Рэспубліканскі конкурс сярод журналістаў і сродкаў масавай інфармацыі на лепшае асвятленне пытанняў міжнацыянальных і міжканфесіянальных адносін, міжкультурнага дыялогу ў Рэспубліцы Беларусь і супрацоўніцтва з суайчыннікамі за мяжой.
Конкурс праводзіцца ў мэтах павышэння эфектыўнасці інфармацыйнага забеспячэння дзяржаўнай палітыкі ў сферы міжнацыянальных і міжканфесіянальных адносін і супрацоўніцтва з суайчыннікамі за мяжой, папулярызацыі шматвекавых традыцый мірнага і паважлівага суіснавання людзей розных нацыянальнасцей і канфесіянальнай прыналежнасці ў Беларусі, прапаганды каштоўнасці культурнай разнастайнасці і міжкультурнага дыялогу ў Рэспубліцы Беларусь.
У конкурсе прымаюць удзел прафесійныя журналісты, пазаштатныя аўтары, рэдакцыі сродкаў масавай інфармацыі, інфармацыйныя агенцтвы.
Для разгляду у 2020 годзе былі атрыманы матэрыялы ад 58 удзельнікаў.
Удзельнікі конкурсу па намінацыі "Друкаваныя СМІ і інфармацыйныя агенцтвы" прадстаўляюць апублікаваныя матэрыялы, а ўдзельнікі конкурсу па намінацыі "Тэлевізійныя і радыёвяшчальныя СМІ" – аўдыё-, відэазапісы праграм па вышэйазначанай тэматыцы.
Для падвядзення вынікаў конкурсу заснавальнікамі было створана журы.
Абвяшчэнне вынікаў конкурсу і ўзнагароджанне яго пераможцаў па кожнай намінацыі традыцыйна праводзілася штогод ў маі-чэрвені, часцей за усё ў межах Міжнародных спецыялізаваных выстаў "СМІ ў Беларусі" ці Рэспубліканскага фестывалю нацыянальных культур.
У сувязі з мерамі, якія прымаюцца Саветам Міністраў Рэспублікі Беларусь і Міністэрствам аховы здароўя па супрацьдзеянні распаўсюджванню інфекцыі, выкліканай каранавірусам COVID-19, а таксама з мэтай санітарнай бяспекі прынята рашэнне аб адмене XIII Рэспубліканскага фестывалю нацыянальных культур і запланаванай на 4 - 5 снежня 2020 года XXIV Міжнароднай спецыялізаванай выставы "СМІ ў Беларусі".
10 снежня 2020 года ў Прэс-цэнтры Дома прэсы адбылася прэс- канферэнцыя на тэму: «Мова беларускіх класікаў і грамадства Web 4.0: узаемадзеянне і трансфармацыя, папулярызацыя ў СМІ».
Падчас мерапрыемства таксама былі названы пераможцы Рэспубліканскага конкурсу сярод журналістаў і сродкаў масавай інфармацыі на лепшае асвятленне пытанняў міжнацыянальных і міжканфесійных адносін, міжкультурнага дыялогу ў Рэспубліцы Беларусь і супрацоўніцтва з суайчыннікамі за мяжой.